Staziu 2005 : resucontu



Staziu 2005 : resucontu
Prima di tuttu ci vole à ringrazià à quelli chì sò ghjunti ancu da luntanu puru ch'ellu fussi pessimu u tempu. Eranu prisenti 7 prufissori di 6 cullegi (Calvi, Baleone, Finusellu, Fesch, Sartè, Portivechju2). Un bellu tempu hè statu passatu à dì a rialità di i stabulimenti, e dificultà è e riescite, e brame è e dumande ferme.... Di sicuru hè poca à presà in contu di u soprapiù di travagliu d'un prufissore di u bislingu... Li ferma pà u più sustisfazzione di fà opara utule ! Sendu ognunu cuscente di quessa, hè parsa à tutti nicissaria di mette u travagliu in cumunu , d'aiutà si è di sceglie un strategia cuerente d'azzione.

Omu hè statu d'accunsentu par dì chì ella saria una bona d'avè una cullizzione di manuali di matematica in corsu da u cullegiu. Si face dighjà pà a storia è pà e matematiche in prima scola. A squadra prisente a si sente di pruvà la li, quand'elli saranu scelti u libru è l'editore - (da quì à maghju chì cambianu quistannu i prugrama di sesta) -in tantu si circarà à avanzà à nantu à uni pochi di particulari di lessicu.

U situ "Scambii" ind'è no avemu dighjà una bella poca di "roba" da sparte, po bastà par avà. Bisognu à dà li vita è suchju è à fà lu cunnosce.D. Ottavi ne assicura l'animazione in tantu ch'ella s'allarghi a squadra. Avemu passatu una stundarella à raghjunà di a nicissità di pusiziunà i matiriali pedagogichi messi in cumunu, è di difinisce ne u statutu. Si tratta quì di e "metadate"(metadonnées) chì ne truvarete calchì sviluppu nantu à "Scambii"

Hè stata intesa dinò ch'è no circariamu d'urganizà u travagliu in gruppi tarrituriali - Purtivichjacciu - Aiacciu - Balagna - cù u doppiu scopu di furmazione è di pruduzzione. Si circarà di fà ch'ellu sia ricunisciutu u travagliu fattu. Ci vole à tene à mente ch'elli si ponu fà stazii "sopra à misura" in lu quadru di u pianu di furmazione di u stabulimentu pà u bislingu . Infine par l'acquistu di cumpetenze generale in lingua corsa ci sò e pussibilità d'urganizà l'APIC cù i prufissori di corsu.

U dopumeziornu l'avemu passatu à armunizà une poche di scelte lessicale... Un modu di difinisce inseme i cunfini trà a necessità di fà si capisce da i zitelli è quella di purtà, à quantu ella si pò, un discorsu schietu in corsu .

     

Rectorat de l'académie de Corse
Boulevard Pascal Rossini
BP 808
20192 Ajaccio CEDEX 4

Tél : +33 (0)4 95 50 33 33
Fax : +33 (0)4 95 51 27 06
Nous contacter

Horaires d'ouverture au public :
du lundi au vendredi
de 9h30 à 11h30
et de 14h30 à 16h
Enquête : «qualité de l'accueil»